اسلام آباد:سپیکر قومی اسمبلی سردار ایاز صادق نے دوحہ پر اسرائیلی بمباری کی شدید مذمت کرتے ہوئے کہا ہے کہ حملہ بین الاقوامی قوانین اور انسانی حقوق کی سنگین خلاف ورزی ہے۔
سپیکر قومی اسمبلی سردار ایاز صادق نے کہا کہ اسرائیل کا قطر پر حملہ قطر کی سالمیت اور خودمختاری پر حملہ ہے، انہوں نے کہا کہ عالمی برادری اسرائیلی جارحیت کا فوری نوٹس لے اورقطر کے نہتے عوام کے تحفظ کو یقینی بنایا جائے، انہوں نے کہا کہ اسرائیلی فسطائیت خطے کے امن و استحکام کے لئے سنگین خطرہ ہے۔
ایاز صادق نے کہا کہ اسرائیل کے ہاتھ لاکھوں بے گناہ فلسطینیوں کے خون سے رنگے ہوئے ہیں، اسرائیلی دہشت گردی پر عالمی برادری کی خاموشی لمحہ فکریہ ہے، عالمی برادری اسرائیلی جارحیت کا فوری نوٹس لے، اسرائیل عالمی قوانین کی کھلی خلاف ورزیاں کر رہا ہے۔
سپیکر سردار ایاز صادق نےقطر کی پارلیمان اور عوام سے یکجہتی کا اظہار کیا اور کہا کہ پاکستان کی پارلیمان اور عوام قطر کے پارلیمان اور عوام کے شانہ بشانہ کھڑے ہیں۔
