لاہور: پاکستان مکسڈ مارشل آرٹس فیڈریشن کے زیر اہتمام آئی ایف ٹی فائٹ پاس 9 کا شاندار انعقاد ایس اے گارڈنز میں کیا گیا جس میں پاکستان کے ساتھ ساتھ افغانستان کے مایہ ناز فائٹرز نے بھی شرکت کی۔ ایونٹ میں مجموعی طور پر 19 فائٹس شامل تھیں جنہوں نے شائقین کو شاندار ایکشن فراہم کیا۔
مین ایونٹ میں پاکستان کے بلال حسین اور افغانستان کے کوروش رجبی کے درمیان مقابلہ ہوا جس میں افغان فائٹر کوروش رجبی نے کامیابی حاصل کی۔ کو-مین ایونٹ میں افغانستان کے روبیل اور پاکستان کے معراج عارف آمنے سامنے آئے، جہاں روبیل نے یہ مقابلہ اپنے نام کیا۔
تقریب کے اختتام پر تمام چیمپیئن فائٹرز کو کیش پرائز، میڈلز اور شیلڈز سے نوازا گیا۔ اس موقع پر پاکستان مکسڈ مارشل آرٹس فیڈریشن کے صدر بابر راجہ اور ڈائریکٹر جنرل سردار حسن صادق نے خصوصی شرکت کی۔
بابر راجہ نے کہا کہ آئی ایف ٹی فائٹ پاس کا مقصد پاکستانی ٹیلنٹ کو محفوظ اور بین الاقوامی معیار کے پلیٹ فارم پر لانا ہے تاکہ نوجوان دنیا کے سامنے اپنی صلاحیتوں کو منوا کر ملک کا نام روشن کریں۔ اور ان کا کہنا تھا کہ اس ایونٹ کے انعقاد کا مقصد صرف یہ تھا کہ پاکستان اور افغانستان کے درمیان تعلقات مزید بہتر سے بہتر ہوں۔
سردار حسن صادق نے کہا کہ پاکستان میں ایم ایم اے تیزی سے ترقی کر رہا ہے اور فیڈریشن نوجوان فائٹرز کو بہترین مواقع فراہم کرنے کے لیے پرعزم ہے۔ تاکہ وہ اپنے کیریئر میں کامیابی حاصل کر سکیں۔
