کراچی: خیبرپختونخوا کے ضلع شمالی وزیرستان سے تیل اور گیس کا نیا ذخیرہ دریافت ہوگیا۔
ماڑی پٹرولیم کمپنی نے ڈیڑھ ماہ سے بھی کم عرصے میں شمالی وزیرستان سے گیس اور تیل کی تیسری دریافت کا اعلان کر دیا۔ترجمان کے مطابق دریافت خیبرپختونخوا کے علاقے ہنگو میں سپن وام ون کنویں سے ہوئی، نئی دریافت سے 2 کروڑ 38 لاکھ مکعب فٹ یومیہ گیس حاصل ہوگی جبکہ یومیہ 122 بیرل خام تیل بھی حاصل ہوگا۔
یاد رہے کہ مارچ 2025 میں ماڑی پٹرولیم کمپنی نے وزیر ستان بلاک سے دوسری دریافت کا اعلان کیا تھا، دوسری دریافت سے 2 کروڑ 5 لاکھ مکعب فٹ یومیہ گیس اور یومیہ 117 بیرل خام تیل حاصل ہونے کا تخمینہ لگایا گیا تھا۔
قبل ازیں ماڑی پٹرولیم کمپنی نے فروری 2025 میں وزیرستان بلاک سے گیس اور تیل کی پہلی دریافت کا اعلان کیا تھا، پہلی دریافت سے ایک کروڑ 30 لاکھ مکعب فٹ یومیہ گیس اور یومیہ 20 بیرل خام تیل حاصل ہونے کا تخمینہ لگایا گیا تھا۔
