تل ابیب:اسرائیلی آرمی چیف نے حکم دیا ہے کہ غزہ میں تمام سرنگوں کو فوری طور پر تباہ کیا جائے۔
عالمی میڈیا کی رپورٹ کے مطابق اسرائیلی فوج کے سربراہ لیفٹیننٹ جنرل ایال زمیر نے دعویٰ کیا کہ سرنگوں میں ان کے خلاف خفیہ سرگرمیاں چل رہی ہیں۔
واضح رہے کہ صیہونی فوج کی جانب سے جنگ بندی معاہدے کی مسلسل خلاف ورزیاں جاری ہیں، قابض فوج نے شجاعیہ میں ڈرون حملہ کرکے بچے کو شدید زخمی کردیا تھا۔
مغربی کنارے میں بھی قابض فوج کی کارروائیاں نہ تھم سکیں، فوج نے رہائشی علاقوں میں آپریشن کے دوران گولیاں مار کر 2 فلسطینیوں کو شہید کردیا تھا۔
ادھر اقوام متحدہ کے ادارہ برائے انسانی ہمدردی کے مطابق مغربی کنارے میں اسرائیلی کارروائیوں میں ایک بار پھر تشویشناک حد تک اضافہ ہونے لگا، ادارے نے بتایا کہ مغربی کنارے میں صرف اکتوبر کے مہینے میں 260 سے زائد حملے کیے جاچکے ہیں۔
