لاہور: پنجاب اسمبلی میں پی ٹی آئی رہنما اعجاز چودھری کی نااہلی کے بعد خالی ہونے والی سینیٹ نشست پر ضمنی انتخاب کیلئے پولنگ کا آغاز ہوگیا۔
ووٹنگ صبح 9 بجے سے شام 4 بجے تک بلا تعطل جاری رہے گی، پولنگ کا عمل پنجاب اسمبلی کی نئی عمارت میں ہوگا، کاغذات نامزدگی واپس لینے کا وقت ختم ہونے کے باعث اپوزیشن امیدوار مقابلے میں موجود ہیں۔
مسلم لیگ (ن) اور حکومتی اتحادی جماعتوں کی جانب سے رانا ثناء اللہ امیدوار ہیں جبکہ اپوزیشن نے اعجاز چودھری کی اہلیہ سلمیٰ اعجاز کو نامزد کیا ہے، اپوزیشن نے آج ووٹ کاسٹ نہ کرنے کا اعلان کر دیا۔
حکومتی امیدوار کو برتری
ذرائع کے مطابق رانا ثناء اللہ کو 263 ووٹوں کی حمایت حاصل ہے جبکہ جیت کے لیے امیدوار کو 181 ووٹ درکار ہیں، اپوزیشن کی امیدوار سلمیٰ اعجاز کو صرف 100 ووٹوں کی حمایت حاصل ہے۔
اپوزیشن کا بائیکاٹ
ادھر ڈپٹی اپوزیشن لیڈر معین قریشی نے اعلان کیا ہے کہ اپوزیشن ضمنی انتخابات کا بائیکاٹ کرے گی اور کوئی رکن ووٹ کاسٹ نہیں کرے گا۔
انہوں نے واضح کیا کہ اگر آج کسی رکن نے اسمبلی میں جا کر ووٹ دیا تو وہ پارٹی پالیسی کی خلاف ورزی کا مرتکب ہوگا۔
پنجاب اسمبلی کی صورتحال
پنجاب اسمبلی میں کل نشستیں: 371
موجودہ اراکین کی تعداد: 363 (8 نشستیں خالی)
مسلم لیگ (ن): 229 ووٹ
پیپلز پارٹی: 16 ووٹ
آئی پی پی: 7 ووٹ
مسلم لیگ (ق): 11 ووٹ
سنی اتحاد کونسل: 73 ووٹ
تحریک انصاف: 24 ووٹ
تحریک لبیک، مسلم لیگ ضیا اور مجلس وحدت مسلمین: 1،1 ووٹ
واضح رہے کہ یہ نشست پی ٹی آئی رہنما اعجاز چودھری کی 9 مئی کیسز میں سزا کے باعث خالی ہوئی تھی، حکومتی اتحاد کے پاس اعداد و شمار کے لحاظ سے واضح اکثریت ہے جس کے باعث رانا ثناء اللہ کی کامیابی یقینی قرار دی جا رہی ہے۔
